निर्वाचन आयोग ले स्थगित गरिएको मतदाता नामावली संकलन तथा अद्यावधिक कार्यक्रम आज (चैत २२) देखि पुनः सुरु गरेको छ ।

प्रतिनिधिसभा सदस्य निर्वाचनका कारण गत मंसिर ६ गतेदेखि रोकिएको यो कार्य आयोगको चैत १८ गतेको निर्णयअनुसार पुनः सञ्चालनमा ल्याइएको हो ।

विज्ञापन

आयोगका अनुसार राष्ट्रिय परिचयपत्र नम्बर भएका नेपाली नागरिकले अब अनलाइन प्रणालीमार्फतै मतदाता नामावलीमा आफ्नो नाम दर्ता गर्न सक्नेछन् ।

यस्तै, राष्ट्रिय परिचयपत्र नभएका नागरिकले ‘प्रि–इन्रोलमेन्ट’ प्रणालीमार्फत अनलाइन फाराम भरेपछि फोटो तथा औँठाछापसहितको जैविक विवरण दिन सम्बन्धित प्रदेश वा जिल्ला निर्वाचन कार्यालयमा उपस्थित हुनुपर्नेछ ।

यस कार्यक्रममार्फत नाम, ठेगाना सच्याउने, दोहोरो नाम हटाउने, मृत्यु तथा बसाइँसराइका विवरण अद्यावधिक गर्ने लगायतका सेवा पनि अनलाइनबाटै उपलब्ध हुने आयोगले जनाएको छ ।

आयोगले सबै योग्य नागरिकलाई मतदाता नामावलीमा नाम दर्ता तथा अद्यावधिक गर्न सक्रिय सहभागिता जनाउन आग्रह गरेको छ